གུང་སེང་སྐབས་ཀྱི་ཚོར་བ།

སློབ་འཁྲིད་བྱ་བར་འཇུག་པའི་ཚེ།།

དགུན་གནང་དུས་དེ་འཆར་བའི་དུས།།

ཀློག་འདོད་ཆེ་བའི་དཔེ་དེབ་འགའ།།

བཀླག་རྒྱུའི་འཆར་འགོད་སེམས་ནས་འཐེན།།

དངོས་སུ་དགུན་གནང་ཤར་ཙ་ན།།

འཕྲོ་ལུས་ཅན་གྱི་བྱ་བ་འགར།།

ཁོམ་པ་ཡོད་ཚད་ཐོགས་པ་ལས།།

དཔེ་དེབ་ཀློག་པའི་སྐབས་མ་ཐོབ།།

དུས་ཡུན་ཅུང་ཟད་ལྷག་པའི་ནང་།།

ཉིན་མ་འདི་ལྟར་འདས་གྱུར་ན།།

བདག་གི་ཐོས་ཉུང་ཀླད་པ་འདི།།

ཐོས་པས་བཀྲེས་ནས་ལུས་ཉེན་འདུག།

ལྷིང་འཇགས་མེད་པའི་ཧི་ལ་དང་།།

དོགས་སློང་སྙིང་སྟོབས་ལ་སོགས་པ།།

ཀློག་འདོད་སྐོམ་པ་ཆུ་འདོད་བཞིན།།

ཡོད་ཀྱང་ཀློག་པའི་དུས་མ་བྱུང་།།

འཇུག་སྐྱོང་བྱ་དགོས་བྱ་བ་དག།

གང་མགྱོགས་རྫོགས་པར་བྱས་ནས་ནི།།

སེམས་ཀྱི་འཆར་འགོད་ཇི་ལྟ་བར།།

དཔེ་ཀློག་ལས་ལ་ཞུགས་ན་ལེགས།།