རང་དབང་ལུང་པའི་ས་ཐོག་ཏུ།།
ཡོད་པའི་ང་ཚོ་བྱེས་མི་ཚོས།།
བཙན་འོག་ཡོད་པའི་གཞིས་མི་ལ།།
གང་ཅིའི་ཐད་ནས་མི་དོ་གི།
བླ་མའི་གསེར་ཞལ་མཇལ་རྒྱུ་དང་།།
གསུང་སྐད་ཐོས་རྒྱུ་མེད་ན་ཡང་།།
བླ་མར་བཅངས་པའི་དད་པ་ལ།།
ང་ཚོ་བྱེས་མིས་མི་དོ་གི།
རྒྱ་མིས་ཐབས་ཤེས་གང་ཡོད་ཀྱིས།།
ཆོལ་གསུམ་དཀྲུག་ལ་བརྩོན་ན་ཡང་།།
སྤུན་ཟླའི་འདུ་ཤེས་ཟབ་མོ་ལ།།
ང་ཚོ་བྱེས་མིས་མི་དོ་གི།
བོད་སྐད་རྒྱག་ཅིང་བོད་ཡིག་ལ།།
སྦྱངས་ན་མཐོང་ཆུང་བྱེད་ན་ཡང་།།
བོད་སྐད་སྲུང་བའི་སྙིང་སྟོབས་ལ།།
ང་ཚོ་བྱེས་མིས་མི་དོ་གི།
འཛམ་གླིང་ལྟ་བའི་མིག་ཟུང་གཉིས།།
བཙན་གྱིས་འགེབས་པར་བྱེད་ན་ཡང་།།
སྣ་མང་ཤེས་བྱའི་མཐོང་རྒྱ་ལ།།
ང་ཚོ་བྱེས་མིས་མི་དོ་གི།
རང་དབང་བྲལ་བའི་གཞིས་མི་ཚོའི།།
ཡོན་ཏན་དེ་དག་མཐོང་བའི་སྐབས།།
ང་ཡི་སེམས་ལ་སྤོབས་སེམས་ཤིག།
ངང་ངམ་ཤུགས་ཀྱིས་རྒྱས་ཀྱི་འདུག།
རང་དབང་ཆ་ཚང་ཡོད་བཞིན་དུ།།
ནང་འཁྲུག་རྒྱག་ལ་མགོ་འཁོར་བའི།།
བྱེས་མིའི་བྱེད་སྟངས་བསམ་པའི་སྐབས།།
སེམས་པ་སྡུག་གིས་མནར་གྱི་འདུག།
༢༠༢༡ ཟླ་ ༠༧ ཚེས་
༡༢ ཉིན་གཞིས་བྱེས་གཉིས་ཀྱི་བྱེད་སྟངས་ལ་བསམ་གཞིག་ཅུང་ཟད་བྱས་རྗེས་བྲིས།
No comments:
Post a Comment