བཙན་བྱོལ་བའི་ལག་རྗེས།

ཕ་ས་མི་ལ་ཤོར་ནས།།

མི་ཡུལ་འགྲིམ་དགོས་བྱུང་སོང་།།

རང་དབང་ལུང་པའི་ནང་ནས།།

སྐད་ཀྱི་རང་དབང་ཤོར་སོང་།།

ཡི་སྒྲ་འི་སྒྲ་ཡོད་བཞིན།།

ཀ་ཀྱི་ཟེར་མཁན་མང་བ།།

ཡང་སྒྲ་འང་སྒྲ་ཡོད་བཞིན།།

བྷི་སྒྲ་བཀོལ་མཁན་མང་བ།།

སྐད་ཆ་རེ་རེའ་མཐའ་ན།།

རཱ་རེ་སྦྱོར་མཁན་མང་བ།།

ང་ཡིས་ཟེར་རྒྱུའི་ཚབ་ལ།།

ངས་གིས་ཟེར་མཁན་མང་བ།།

ཉེར་མཁོའི་ཅ་དངོས་དག་ལ།།

བོད་བརྡ་མེད་པ་མིན་ཡང་།།

དབྱིན་ཧིན་ཤེས་ངོམ་བྱས་ཏེ།།

སྐད་ལ་བསྲེ་ལྷད་བཅུག་གི།།

བོད་ཀྱི་སྐད་ཡིག་གཉིས་པོ།།

བོད་པའི་བླ་སྲོག་ཡིན་ན།།

སྐད་ལ་བསྲེ་ལྷད་བཅུག་པ།།

རང་ཤི་མིན་ན་ཅི་ཡིན།།