ཟླ་བ་བཞི་ཙམ་རྗེས་ལ།།
ཤ་ལས་ཆད་པའི་བུ་མོ།།
མངོན་སུམ་མིག་གིས་རིག་དུས།།
སེམས་པ་དགའ་བས་མྱོས་སོང་།།
བུ་མོའི་སྐད་ཆ་ཤོད་སྟངས།།
བུ་མོའི་བསམ་བློ་གཏོང་སྟངས།།
བུ་མོའི་གོ་བ་ལེན་སྟངས།།
སྤོབས་པའི་གཞི་མ་རེད་འདུག།
འཛིན་གྲྭ་གཉིས་པའི་སྒོ་ཐེམ།།
འགྲིམ་ལ་ཉེ་ཙམ་ཡིན་མོད།།
རྩོམ་ཡིག་ཐར་ཐོར་འབྲི་དུས།།
དགའ་སྤྲོ་རབ་ཏུ་འཕེལ་སོང་།།
དཔར་ལེན་བྱེད་པའི་སྐབས་སུ།།
ཡི་གར་འོང་བའི་རྣམ་འགྱུར།།
སྣ་ཚོགས་བསྟན་པ་དེ་དག།
སེམས་ཀྱི་གཏིང་ལ་ཟུག་སོང་།།
ཨ་ཕ་ང་དང་མཉམ་དུ།།
འགྲོ་བའི་འདོད་པ་བྱེད་བཞིན།།
ཨ་མ་བཞག་པར་སེམས་ཁྲལ།།
བྱེད་ལུགས་ཤ་ནི་ཚ་བ།།
ང་རང་ཐོན་ལ་ཉེ་དུས།།
བུ་མོའི་ཁྲ་ཆུང་མིག་ནས།།
མཆི་མ་ངང་གིས་ལྷུང་དུས།།
སེམས་ལ་ན་ཟུག་བཏང་སོང་།།
རིང་མིན་མོན་གྷོ་ཕྱོགས་ལ།།
གནས་སྤོ་ཐོབ་པར་གྱུར་ནས།།
ནང་མི་ལྷན་འཛོམས་དཔལ་ལ།།
སྤྱོད་རྒྱུ་ཡོང་བར་ཤོག་ཅིག།
No comments:
Post a Comment