ཧི་མ་ཅལ་ཞེས་མངའ་སྡེའི་ནང་།།
དྷོ་ལན་ཇི་ཞེས་བྱ་བ་ཡོད།།
ལུང་ཁུག་དེ་ཡི་སྐྱོན་ཡོན་འགའ།།
འདི་རུ་གསོང་པོར་བརྗོད་ལ་སྤྲོ།།
གྲོང་པ་མང་པོ་མེད་ན་ཡང་།།
རྒྱ་བོད་ཕན་ཚུན་མཐུན་ལམ་བཟང་།།
འགྲོ་ལམ་བདེ་པོ་མེད་ན་ཡང་།།
ཡུལ་གྱི་བཀོད་པ་མཛེས་སྡུག་ལྡན།།
ཟ་ས་འཐུང་ས་ཉུང་ན་ཡང་།།
དྭངས་གཙང་ཆུ་མིག་བརྡོལ་ས་མང་།།
མི་མང་མཉམ་འཛོམས་དུས་དཀོན་ཡང་།།
ཞལ་འདོན་དབྱངས་རྟ་རྣ་ལ་སྙན།།
རྩེད་ཐང་ཆེན་པོ་མེད་ན་ཡང་།།
གོམ་འགྲོས་བྱེད་ས་གང་མང་ཡོད།།
ཁ་བརྡ་གློད་ས་ཉུང་ན་ཡང་།།
ལྷིང་འཇགས་དཀྲོག་མཁན་མང་པོ་མེད།
ཁང་གླ་ཆེ་ཙམ་ཡོད་ན་ཡང་།།
བསམ་ཤེས་ཅན་གྱི་ཁང་བདག་ཡོད།།
མཚམས་ལ་སྡོད་མཁན་མང་ན་ཡང་།།
འཛོམས་དུས་སྙན་པའི་དགོད་སྒྲ་ཡོ
གནམ་གཤིས་གྲང་ངར་ཆེ་ན་ཡང་།།
སློབ་ལ་བརྩོན་པའི་སློབ་མ་ཡོད།།
འཁྲུག་ཆ་དོད་པོ་མེད་ན་ཡང་།།
ཡིད་ཚིམ་གྲུབ་འབྲས་འདི་རུ་ཡོད།།
གང་དང་གང་དུ་སོང་གྱུར་ཀྱང་།།
སྐྱོན་ཡོན་མེད་པ་སྲིད་དཀའ་ཡང་།།
འདི་ཡི་ཡོན་ཏན་དག་མཐོང་དུས།།
སེམས་ལ་དགའ་བ་ངང་གིས་རྒྱས།།
No comments:
Post a Comment