བརྩིག་རྒྱུའི་སེམས་ཀྱི་རྨི་ལམ།།
རྒྱུ་རྐྱེན་འཛོམས་པའི་ངང་ནས།།
བཟའ་ཟླ་བུ་ཕྲུག་གཉིས་དང་།།
ས་ཐག་ཉེ་ས་ཞིག་ལ།།
ལས་ཀ་རག་འདོད་གཞིར་བཟུང་།།
གནས་སྤོས་ཐོབ་པའི་ལོ་ཡིན།།༼༢༣།༠༢༽
གནམ་གཤིས་ཚ་དྲོད་མཉམ་ཞིང་།།
མཁོ་རྒུ་བདེ་བླག་འཐོབ་པའི།།
ལྷོ་ཕྱོགས་སྦེལ་ཀོབ་གནས་སུ།།
ལས་བཅར་ཞུས་པའི་ལོ་ཡིན།།༼༢༣།༠༣༽
གཏམ་བཤད་རེ་མོས་སྐབས་སུ།།
དཔེ་ཀློག་དགེ་མཚན་བཅུ་དང་།།
ཀློག་ཚུལ་སོགས་ཀྱི་སྐོར་ལ།།
གཏམ་བཤད་བྱས་པའི་ལོ་ཡིན།།༼༢༣།༠༤༽
སྐུ་ན་བགྲེས་པའི་བླ་མའི།།
གསེར་ཞལ་མཇལ་རྒྱུ་བྱུང་ཞིང་།།
མགོ་ལ་རྙེད་དཀའི་ཕྱག་དབང་།།
སྐལ་བཟང་སྨིན་པའི་ལོ་ཡིན།།༼༢༣།༠༥༽
ཚ་བོ་གེ་སར་རྣམ་རྒྱལ།།
མངོན་སུམ་མིག་གིས་མཐོང་ཞིང་།།
བརྩེ་བས་བྲང་ལ་སྦྱར་ཏེ།།
ཡར་མར་ཁུར་བའི་ལོ་ཡིན།།༼༢༣།༠༥༽
སྐར་མ་ལྔ་ཅན་ཡིན་པའི།།
ཟ་ཁང་ཆེན་མོར་ཕྱིན་ནས།།
སྣ་མང་བཅུད་ལྡན་ཟས་ལ།།
རོལ་རྒྱུ་བྱུང་བའི་ལོ་ཡིན།།༼༢༣།༠༥༽
ལྡི་ལི་མན་ཇུ་ཊི་ལིའི།།
མ་སྐྱེས་ཨ་མ་ཞེས་པའི།།
གྲགས་ཅན་ཟ་ཁང་ནང་ལ།།
དངོས་སུ་བསྐྱོད་པའི་ལོ་ཡིན།།༼༢༣།༠༥༽
བརྩེ་ལྡན་ཚེ་རོགས་ལྷན་དུ།།
ཁྲོམ་ར་ཆེན་མོར་ཕྱིན་ནས།།
སི་ཊར་བྷག་སི་འཚིག་ཇ།།
མཉམ་དུ་བཏུངས་པའི་ལོ་ཡིན།།༼༢༣།༠༥༽
ཀམ་ལ་གྲོང་དུ་ཡོད་པའི།།
མངར་ཟས་ཚོང་ཁང་ནང་ནས།།
བཟའ་བྱ་དམིགས་བསལ་ཅན་ཞིག།
བཟའ་ཟླས་སྟེར་བའི་ལོ་ཡིན།།༼༢༣།༠༥༽
གཅེས་ཕྲུག་བསྟན་འཛིན་འཛོམས་སྐྱིད།།
རང་ལོ་དགུ་ལ་སོན་པའི།།
བཀྲ་ཤིས་སྐྱེས་སྐར་སྲུང་བརྩི།།
ལྡི་ལིར་བྱས་པའི་ལོ་ཡིན།།༼༢༣།༠༦༽
ནང་མི་མཉམ་འཛོམས་ངང་ནས།།
གྱ་བརྒྱད་ཕེབས་པའི་འཁྲུངས་སྐར།།
ལྷོ་གཞིས་སྦེལ་ཀོབ་ཡུལ་དུ།།
གཏང་རྒྱུ་བྱུང་བའི་ལོ་ཡིན།།༼༢༣།༠༧༽
འཕགས་མ་རྗེ་བཙུན་མ་དང་།།
༸རྒྱལ་དབང་ཡིད་བཞིན་ནོར་སོགས།།
རྒྱལ་བ་སྲས་བཅས་དྲུང་དུ།།
ཆང་རག་བཅད་པའི་ལོ་ཡིན།།༼༢༣།༠༨།༠༩༽
ལྷོ་ཁུལ་བོད་སློབ་དྲུག་པོས།།
ང་ཚོའི་སྡིངས་ཆའི་སྒང་ནས།།
བགྲོ་གླེང་གཏམ་བརྗོད་ལ་སོགས།།
གཟིགས་འབུལ་ཞུས་པའི་ལོ་ཡིན།།༼༢༣།༡༠༽
དགོས་པ་མང་པོར་བལྟས་ཏེ།།
གཅེས་ཕྲུག་བསྟན་འཛིན་འཛོམས་སྐྱིད།།
ཟམ་པ་སློབ་གྲྭའི་ནང་ལ།།
སློབ་འཇུག་ཞུས་པའི་ལོ་ཡིན།།༼༢༣།༡༠༽
ང་དང་པ་སངས་ལྷ་མོ།།
འཇིག་རྟེན་མཐུན་འཇུག་བྱས་ཏེ།།
བཅུ་གཅིག་འཁོར་བའི་ཉིན་མོ།།
མཉམ་དུ་བསུས་པའི་ལོ་ཡིན།།༼༢༣།༡༠༽
ཚེ་རོགས་མཛེས་བཟང་མ་ཡིས།།
ང་ཡི་སྐྱེས་སྐར་ཉིན་མོར།།
རྐང་པར་རན་པའི་ལྷམ་ཞིག།
སྐྱེས་སུ་གནང་བའི་ལོ་ཡིན།།༼༢༣།༡༡༽
ང་ཡི་མི་ཚེའི་འཇིག་རྟེན།།
བཟའ་ཟླ་གཅེས་ཕྲུག་གཉིས་པོ།།
དགུན་ཁའི་གུང་སེང་གཏོང་དུ།།
ངའི་སར་སླེབས་པའི་ལོ་ཡིན།།༼༢༣།༡༢༽
མདོར་ན་དྲན་པར་འོས་པའི།།
གནས་ཚུལ་དུ་མ་བྱུང་བས།།
ཕྱི་ལོ་ཉིས་སྟོང་ཉེར་གསུམ།།
དམིགས་བསལ་ལོ་རུ་གྱུར་སོང་།།
No comments:
Post a Comment