རང་དབང་ཡོད་པོ་རྐང་རྗེན་འགྲོ།།
རང་དབང་མེད་པོས་ལྷམ་རྫིག་གྱོན།།
ང་ཚོ་ཡུལ་གྱར་བོད་མི་ཡི།།
འཚོ་བ་ངོ་མ་སྐྱིད་པོ་རེད།།
རང་དབང་ཡོད་པོ་རྐང་ཐང་འགྲོ།།
རང་དབང་མེད་པོས་འཕྲུལ་རྟ་བཞོན།།
ང་ཚོ་ཡུལ་གྱར་བོད་མི་ཡི།།
འཚོ་བ་ངོ་མ་སྐྱིད་པོ་རེད།།
རང་དབང་ཡོད་པོས་གཡོག་ལས་བྱེད།།
རང་དབང་མེད་པོས་བཀོད་འདོམས་བྱེད།།
ང་ཚོ་ཡུལ་གྱར་བོད་མ་ཡི།།
འཚོ་བ་ངོ་མ་སྐྱིད་པོ་རེད།།
རང་དབང་ཡོད་པོར་ལག་དངུལ་ཉུང་།།
རང་དབང་མེད་པོར་ལག་དངུལ་འབེལ།།
ང་ཚོ་ཡུལ་གྱར་བོད་མི་ཡི།།
འཚོ་བ་ངོ་མ་སྐྱིད་པོ་རེད།།
རང་དབང་ཡོད་པོའི་ཁ་པར་དམན།།
རང་དབང་མེད་པོའི་ཁ་པར་རྫིག།
ང་ཚོ་ཡུལ་གྱར་བོད་མི་ཡི།།
འཚོ་བ་ངོ་མ་སྐྱིད་པོ་རེད།།
རང་དབང་ཡོད་པོའི་ཁང་པ་གོག།
རང་དབང་མེད་པོའི་ཁང་པ་བརྗིད།།
ང་ཚོ་ཡུལ་གྱར་བོད་མི་ཡི།།
འཚོ་བ་ངོ་མ་སྐྱིད་པོ་རེད།།
འཚོ་བ་སྐྱིད་པོ་བྱུང་བ་དེ།།
༸ཡིད་བཞིན་ནོར་བུའི་སྐུ་དྲིན་རེད།།
ཁོང་གི་བཀའ་བཞིན་བསྒྲུབ་རྒྱུ་དེ།།
ཡུལ་གྱར་བོད་མིའི་འོས་འགན་རེད།།
No comments:
Post a Comment