ཀུ་ཤུའི་གྲོང་།

མཐོ་སློབ་ཐོན་ལ་ཉེ་སྐབས།།
བསམ་བློ་མང་པོ་བཏང་ཡང་།།
ཐ་མར་ཀུ་ཤུའི་གྲོང་དུ།།
སླེབས་པ་རྨི་ལམ་འདྲ་སོང་།།

ཡུལ་གྱི་བཀོད་པ་མཛེས་པ།།
བོད་ཀྱི་ཡུལ་དང་འདྲ་བ།།
ཡུལ་མིའི་གདོང་གི་བཟོ་དབྱིབས།།
བོད་ཀྱི་མི་དང་འདྲ་བ།།

མཛའ་མོ་དྲན་གླུ།

རྒྱུས་མེད་ཡུལ་དུ་སླེབས་སོང་།།
གྲོགས་མེད་ཁེར་རྐྱང་ལུས་སོང་།།
བརྩེ་བ་ཟབ་པའི་མཛའ་མོ།།
ཡིད་ལ་གསལ་ལེར་དྲན་བྱུང་།།

སྔོ་ལྗང་ནགས་རི་མཛེས་ཤིང་།།
དྭངས་གཙང་ཆུ་བོ་འབབ་ཀྱང་།།
མཛའ་མོ་ལྷན་དུ་མེད་དུས།།
ཡོད་ཚད་སྙིང་པོ་མི་འདུག།

སྣ་བཅད་ལས་བརྩམས་དེ་འགྲིག་གམ།།

རང་ས་གཞན་ལག་ཏུ་ཤོར་སོང་།།
གཞན་ཡུལ་འཁྱམ་དགོས་དེ་བྱུང་སོང་།།
གཞན་ཡུལ་རང་ཡུལ་ལྟར་བྱས་ནས།།
གང་བསམ་འཁྲབ་པ་དེ་འགྲིག་གམ།།

རང་མི་གཞན་མི་ཡིས་བཀྲོངས་སོང་།།
རང་མི་གཞན་མི་ཡིས་རྨས་སོང་།།
རང་དགྲ་རྒྱ་ཡན་དུ་བཏང་ནས།།
རང་མི་གསོད་པ་དེ་འགྲིག་གམ།།

ཁེར་རྐྱང་གི་འཚོ་བ།

ཁེར་སྡོད་ཁེར་ཟ་ཁེར་འཐུང་གི་འཚོ་བར།།
དངོས་སུ་ཞུགས་ཏེ་ཉིན་ཞག་དེ་འདེད་དུས།།
གྲོགས་འདུས་སྐབས་ཀྱི་རྒོད་སྒྲ་དེ་དྲན་ཞིང་།།
གྲོགས་ཁྱུའི་དབུས་སུ་ཡོད་འདོད་ཅིག་སྐྱེ་གི།