སྣ་བཅད་ལས་བརྩམས་དེ་འགྲིག་གམ།།

རང་ས་གཞན་ལག་ཏུ་ཤོར་སོང་།།
གཞན་ཡུལ་འཁྱམ་དགོས་དེ་བྱུང་སོང་།།
གཞན་ཡུལ་རང་ཡུལ་ལྟར་བྱས་ནས།།
གང་བསམ་འཁྲབ་པ་དེ་འགྲིག་གམ།།

རང་མི་གཞན་མི་ཡིས་བཀྲོངས་སོང་།།
རང་མི་གཞན་མི་ཡིས་རྨས་སོང་།།
རང་དགྲ་རྒྱ་ཡན་དུ་བཏང་ནས།།
རང་མི་གསོད་པ་དེ་འགྲིག་གམ།།


དགྲ་ལ་རྐུབ་ཕྱོགས་དེ་བསྟན་ཏེ།།
གཞན་ཡུལ་འགྲིམ་པ་དེ་བརྗེད་ནས།།
རང་མི་གཉོམ་ཆུང་གི་ཁྲོད་དུ།།
རྫིག་རྫིག་བྱེད་པ་དེ་འགྲིག་གམ།།

དགྲ་བོས་གཡོ་སྒྱུ་ཡི་འོག་ནས།།
འཛམ་གླིང་མི་མང་དག་བསླུས་སོང་།།
རང་མིས་ཚོང་སྤོགས་ལ་བསམ་ནས།།
མགོ་སྐོར་གཏོང་བ་དེ་འགྲིག་གམ།།

རང་སར་བོད་ཡིག་གི་སྦྱོང་སྐལ།།
དགྲ་བོས་མེད་པ་ནི་བཟོས་སོང་།།
བྱེས་མིས་བོད་སྐད་དང་དབྱིན་ཇི།།
བརྗེ་བོ་བྱེད་པ་དེ་འགྲིག་གམ།།

རྒྱལ་གཅེས་དཔའ་བོ་དང་དཔའ་མོ།།
རྒྱ་མིས་བཙོན་ཁང་དུ་བཅུག་སོང་།།
བྱེས་མི་དངུལ་གསོག་གི་ཆེད་དུ།།
ནུབ་ཕྱོགས་འགྲིམ་པ་དེ་འགྲིག་གམ།།


དགྲ་བོས་རང་མི་ལ་བརྙས་སོང་།།
མི་རིགས་དབྱེ་འབྱེད་དེ་བྱས་སོང་།།
རང་མིས་རང་མི་ལ་བརྙས་ཏེ།།
སྣ་བཅད་ལས་བརྩམས་དེ་འགྲིག་གམ།།