ལོ་མ་རླུང་གིས་འདེད་པ་བཞིན།།
ལོ་ཡང་ལོ་ལྟར་འགྱུར་བཞིན་འདུག།
ཉིས་སྟོང་བཅུ་བཞི་རྫོགས་ནས་འདུག།
ཕྱི་ལོ་གསར་པའི་དུས་ཡུན་ནང་།།
ཡིད་ཀྱི་བསམ་དོན་མང་པོ་ཞིག།
འབད་མེད་ལྷུན་གྱིས་འགྲུབ་པ་ཡི།།
སེམས་ཀྱི་གཏིང་ནས་སྨོན་འདེབས་ཞུ།།
གངས་རིའི་ལྷ་སྐལ་ཆེན་པོ་མཆོག།
གངས་རིའི་ཞིང་དུ་ཞབས་འཁོད་ནས།།
གངས་རིའི་ཕོ་བྲང་དམར་པོ་ནས།།
གངས་རིའི་སྐྱེ་འགྲོར་ཆོས་གསུང་ཤོག།
གཞིས་བྱེས་འཛོམས་པའི་དུས་ཤར་ནས།།
ཕྱོགས་བཞིར་གྲམ་པའི་བོད་མི་རྣམས།།
ཕོ་བྲང་དམར་པོའི་མདུན་ཐང་ནས།།
བདེ་དགར་རོལ་བའི་སྨོན་འདེབས་ཞུ།།
ལོ་ན་མཐོ་བའི་མ་ལོ་ལ།།
རྒན་གཡོག་ཚུལ་བཞིན་ཞུས་བྱས་ཏེ།།
གཞལ་བར་དཀའ་བའི་བཀའ་དྲིན་ཆ།།
ཅུང་ཟད་འཇལ་བར་ནུས་པར་ཤོག།
འདོ་བ་རྟ་ལ་བཞོན་བྱས་ཏེ།།
མཛེས་ཤིང་ཡངས་པའི་རྩ་ཐང་གི།།
མཛེས་སྡུག་མིག་གི་ལོངས་སྤྱོད་དུ།།
སྨིན་པའི་སྨོན་ལམ་ཡང་ཡང་འདེབས།།
ཕྱི་ལོ་ ༢༠༡༥ ཟླ་ ༠༡ ཚེས་ ༠༦ ཉིན་ཤར་མར་བྲིས།
No comments:
Post a Comment