ཚོགས་ཐུན་དང་པོ།

བདུན་པ་ཡོལ་ཙམ་ཞིག་ལ་གཉིད་ལས་སད།།
བྲེལ་འཚུབ་ཆེན་པོས་ཁ་ངོ་བཀྲུས་པར་བྱས།།
རྗེས་ལུས་ཐེབས་ན་མི་ལེགས་བསམ་པ་ཡིས།།
ཞོགས་པའི་ཟས་ཀྱང་མེད་པར་འཛིན་གྲྭར་བསྐྱོད།།


བཅུ་གཉིས་འཁོར་ལོའི་འཛིན་གྲྭར་འཛུལ་མ་ཐག།
ླཅི་ཞིག་བསླབས་ན་སྙམ་པའི་དོགས་འདྲི་སླེབས།།
སློབ་མ་འགའ་རེ་བསླངས་ཏེ་རྒྱུན་ལྡན་དུ།།
ནོར་འཁྲུལ་བྱེད་པའི་དག་སྡེབ་འགའ་རེ་དྲིས།།

ཁྲི་སྲོང་སྐབས་སུ་ཕྱི་ནས་གདན་དྲངས་པའི།།
སྨན་པ་གྲགས་ཅན་དགུ་ཡི་གྲངས་འདྲེན་དེ།།
རྒྱུགས་ཆེན་ནང་དུ་ཡང་ཡང་སླེབས་པའི་ཕྱིར།།
སློབ་མར་ཅི་ཙམ་བཤད་རྒྱུ་ཡོད་མེད་བལྟས།།

སྨན་པ་མཁས་པ་དགུ་པོ་དེ་དག་གི།
ཡུལ་དང་མིང་ནི་གཅིག་ཀྱང་མ་ནོར་བར།།
ཚུལ་བཞིན་བཤད་རྒྱུ་ཡོད་པའི་སློབ་མ་ནི།།
ཉིན་མོའི་སྐར་མ་ཡིན་པ་ད་གཟོད་རྟོགས།།

དེ་ཚོ་ཤེས་ན་གནད་འགག་ཡོད་པའི་ཕྱིར།།
སྨན་པ་དགུ་པོའི་ཡུལ་དང་མིང་ལ་སོགས།།
མདུན་གྱི་ནག་པང་ངོས་སུ་བྲིས་བྱས་ཏེ།།
བློ་རུ་ངེས་དགོས་ཆེ་བའི་གནས་ལུགས་བཤད།།

སྨན་པ་འགའ་ཡི་མིང་གི་དག་ཆ་ནི།།
འབྲི་བར་དཀའ་ཞིང་འདོན་པར་དཀའ་བས་ན།།
འབྲི་ཀློག་ཇི་ལྟར་དགོས་པའི་ལམ་སྟོན་ཞིག།
སློབ་མ་རྣམས་ལ་གཟབ་ནན་ངང་ནས་བཤད།།

ཚོགས་ཐུན་དང་པོ་གྲོལ་བའི་ཏིང་སྒྲ་ཞིག།
ཐོས་འཛིན་བུ་གའི་ནང་དུ་ལྷུང་མ་ཐག།
འབྲི་མཚམས་བཤད་མཚམས་གཉིས་པོ་བཞག་བྱས་ཏེ།།
རང་གི་ལྟོ་ཕད་ཁྱེར་ནས་ཕྱི་རུ་ཐོན།།