འཆད་འཁྲིད་རྐྱང་པ་གནང་ནས་མི་བཞུགས་པར།།
གད་མོ་སློང་བའི་དགོད་བྲོའི་མཚར་གཏམ་གྱིས།།།
ཉོབ་སྣང་སྐྱེ་བའི་གོ་སྐབས་འཕྲོག་མཁས་པའི།།
དགེ་བཤེས་ལྷག་རྡོར་འཁྲིད་རྩལ་ཨེ་མ་མཚར།།
སྤྱོད་འཇུག་ཙམ་གྱིས་ཆོག་པར་མི་གནང་བར།།
སྒོམ་དང་མཚན་ཉིད་དེ་བཞིན་སློབ་མ་ཡི།།
དོགས་པ་ཡོད་ཚད་ལན་གྱིས་སེལ་གནང་བའི།།
ཆོས་དགེ་ཟུང་གི་ཐུགས་བརྩེ་ཨེ་མ་མཚར།།
སྣང་བ་སྐྱིད་པོས་སློབ་འཁྲིད་གནང་བའི་ཐོག།
ལུས་སེམས་བདེ་སྐྱིད་ངང་ནས་གནས་པའི་ཐབས།།
ལུས་སྦྱོང་སོགས་ཀྱང་བརྩེ་བས་སློབ་གནང་བའི།།
སྒྱུར་དགེ་མཆོག་གི་དགོངས་པ་ཨེ་མ་མཚར།།
ཤ་ཚའི་གཏམ་དང་འཁྲིད་ཐབས་སྣ་མང་གིས།།
བོད་ཡིག་སྦྱོང་ལ་ཉོབ་པའི་སློབ་མ་ཡང་།།
བོད་ཡིག་སྦྱོང་ལ་སྤྲོ་བ་སྤེལ་གནང་བའི།།
བོད་དགེ་ན་གའི་བཟོད་པ་ཨེ་མ་མཚར།།
བོད་པ་མིན་ཡང་བོད་ལ་སེམས་དཀར་ཞིང་།།
རྒྱས་སྤྲོས་སྤངས་ནས་གཞན་ཕན་བསམ་པ་ཡིས།།
ཧུར་བརྩོན་ཆེན་པོས་སློབ་ཚན་འཁྲིད་གནང་བའི།།
དབྱིན་དགེ་ཀེ་རིའི་སེམས་ཤུགས་ཨེ་མ་མཚར།།
གསུང་བཤད་རིང་པོའི་སྙིང་དོན་ལེན་མཁས་ཤིང་།།
ང་ཚོའི་དགོས་མཁོ་ཅི་དང་གང་ཡིན་ཡང་།།
འབད་པ་བརྒྱ་ཡིས་སྐོང་ལ་བརྩོན་གནང་བའི།།
ཚོགས་སྐྱོང་ཟླ་སྒྲོན་བསམ་ཤེས་ཨེ་མ་མཚར།།
༢༠༡༥།༠༨།༢༠ ཉིན་གྲོགས་པོ་ཞིག་གིས་བསྐུལ་བ་ལྟར་བྲིས།
No comments:
Post a Comment