ལས་ཀྱི་མིང་ཅན་མ་ལ་གསང་པོར་བརྗོད་པའི་སྙིང་གཏམ་དམར་རྗེན་མ།

འདྲེན་བྱེད་ཟུང་གི་ཡུལ་དུ་གྱུར་ནས་བཟུང་།། 

ལྟ་བྱེད་ཟུང་གི་ཡུལ་དུ་ཟུག་པར་གྱུར།། 

ཐུང་བའི་མིང་ཉིད་ངེས་པར་གྱུར་ནས་བཟུང་།། 

བློ་ཡི་བུང་བ་འཁོར་ས་ཉིད་དུ་གྱུར།། 

སྐད་ནི་འཛེར་ཞིང་རྩུབ་པའི་གཤིས་མངའ་ཞིང་།། 

སློབ་མར་བསྟོད་པའི་ངང་ཚུལ་མ་རིག་ཀྱང་།། 

སེམས་སོང་བུ་མོ་ཞིག་དང་གཤིས་མཚུངས་ནས།། 

སེམས་ཀྱི་དྲོ་སར་ངང་གིས་བསུ་བར་བརྩམས།། 

བལྟ་བས་མི་ངོམས་ཞལ་དཀྱིལ་མི་འཛོམས་ཤིང་།། 

ཕྲ་སྦོམ་རན་པའི་སྐྱེས་གཟུགས་མི་ལྡན་ཡང་།། 

སྔོན་མའི་སེམས་ཀྱི་བག་ཆགས་ཟབ་མོ་ཡིས།། 

གང་ཞིག་མ་རིག་ཉིན་གང་སྟོང་སྣང་སྐྱེས།། 

སེམས་ཀྱི་བསམ་ཚུལ་སྦ་གསང་ཡེ་མེད་པར།། 

གསོང་པོར་བརྗོད་ཀྱང་དགོད་ཙམ་བྱེད་པ་ལས།། 

མི་སྙན་ཚིག་གིས་གཤེ་བར་མི་བྱེད་པ།། 

ལྷག་པར་ཆགས་ཤིང་དགའ་བའི་གཞི་མར་གྱུར།། 

དེ་རིང་གྲོགས་དང་ཁ་བརྡ་གློད་པ་ལས།། 

བུ་མོ་ཁྱེད་ཀྱི་ཕྱོགས་གཞན་རྟོགས་གྱུར་བས།། 

ད་ནི་སྨྱོན་པའི་ངང་ཚུལ་སྤངས་བྱས་ཏེ།། 

ཚུལ་ལྡན་ལས་ཀ་རྩོམ་ལ་འབད་ངེས་ཡིན།། 

སེམས་ན་ཟུག་ཁྱེད་སེམས་ཀྱི་གཏིང་རིམ་དུ།། 

གནས་པར་མ་ཟད་རྨི་ལམ་ནང་དུ་ཡང་།། 

ལན་འགར་ཕེབས་ནས་འཁྲུལ་སྣང་འཇིག་རྟེན་ལ།། 

བདེ་སྐྱིད་བསྣན་པ་ནམ་ཡང་ཚོར་བཞིན་ཡོད།། 

ཁྱེད་ལ་འོས་པ་བདག་ཉིད་མིན་ཤེས་ཀྱང་།། 

ཁྱེད་ལ་འོས་པའི་ཚེ་རོགས་བཟང་པོ་ཞིག། 

ཁྱེད་ལ་ཐོབ་ནས་བདེ་སྐྱིད་འཚོ་བ་ཞིག།། 

ཁྱེད་ལ་འཐོབ་པའི་སྨོན་འདུན་སྙིང་ནས་ཞུ།། 

༢༠༢༢།༠༤།༢༥ ཉིན་ཧོབ་བྲིས་བྱས།།