ཆར་པ་འབབ་པ་ནང་བཞིན།།
ཤེས་ཡོན་འཇོ་མཁན་ཡོད་ན།།
མཁས་པའི་གོ་འཕང་ཞེས་པ།།
ཐག་རིང་ཞིག་ན་ཨེ་ཡོད།།
རྐང་དྲུག་བུང་བ་ནང་བཞིན།།
སློབ་ལ་བརྩོན་མཁན་ཡོད་ན།།
གཏོང་ཡིག་མི་ཤེས་མིང་ཆད།།
འཕྲལ་མ་ཉིད་དུ་ཡལ་འགྲོ།།
དྲིན་ཆེན་ཕ་མ་ནང་བཞིན།།
ལམ་སྟོན་གནང་མཁན་ཡོད་ན།།
མདུན་ལམ་མེད་པའི་བོད་ཕྲུག།
སྤྱི་ཚོགས་ནང་ལ་མི་ཡོང་།།
དུས་ཐོག་ཆར་པ་ནང་བཞིན།།
རོགས་ཕན་བྱེད་མཁན་ཡོད་ན།།
འཁོར་བ་སྡུག་གི་གནས་འདི།།
བདེ་བའི་ཚལ་དུ་འགྱུར་འགྲོ།།
སོ་སྐྱེ་ཕལ་པ་ལ་ཡང་།།
རྫུ་འཕྲུལ་བསྟན་རྒྱུ་ཡོད་ན།།
ང་རང་འཕྲལ་མ་ཉིད་དུ།།
ཨ་མའི་གམ་དུ་ཆས་འགྲོ།།
རྗེ་བཙུན་མི་ལ་ནང་བཞིན།།
ནུས་མཐུ་བདག་ལ་ཡོད་ན།།
བསམ་མེད་རྒྱ་དམར་དེ་ཚོ།།
རང་ས་བོད་ནས་བསྐྲད་ཆོག།
སློབ་དཔོན་ན་ག་ནང་བཞིན།།
ཞི་འཇམ་བདག་ལ་ཡོད་ན།།
བདག་གི་སློབ་མ་དེ་ཚོའི།།
བློ་ཁ་སློབ་ལ་དྲངས་ཆོག།
སློབ་དཔོན་བེ་རི་ནང་བཞིན།།
རྩོམ་རྩལ་བདག་ལ་ཡོད་ན།།
བོད་པའི་ལུགས་ངན་མང་པོ།།
དམར་རྗེན་ཡི་གེར་བཀོད་ཆོག།
མཁས་དབང་ཟམ་གདོང་ནང་བཞིན།།
འཆད་རྩལ་བདག་ལ་ཡོད་ན།།
མིང་དོན་མཚུངས་པའི་མི་ཞིག།
ཆགས་པར་དཀའ་ཚེགས་ཅི་ཡོད།།སྣང་བ་སྐྱིད་དུས་ཤིག་ལ་བྲིས།
No comments:
Post a Comment