བོད་པའི་ནང་ཆོས་གྲགས་ཅན་དེ།།
རྒྱ་གར་ཡུལ་ནས་དར་བ་རེད།།
བོད་པའི་སྙན་ངག་བརྗིད་ཅན་དེ།།
རྒྱ་གར་ཡུལ་ནས་དྲངས་པ་རེད།།
རྒྱ་གར་ཡུལ་ནས་སླེབས་པ་ལ།།
དགག་བྱ་ཅི་ཡང་མེད་ན་ཡང་།།
བོད་པའི་སྐད་དང་མི་མཐུན་བཞིན།།
ཨུ་ཚུགས་བྱེད་ལ་དགག་པ་ཡོད།།
བོད་ཀྱི་སྙན་ངག་ལ་མཚོན་ན།།
བོད་ཀྱི་སྐད་ཀྱི་གཤིས་ཀ་དང་།།
མཐུན་མིན་བརྟག་པར་མི་མཛད་པར།།
ཡོད་ཚད་ཡོང་བའི་རེ་བ་བཅངས།།
སྦྱར་བའི་དཔེ་དང་མཉམ་ཉིད་ཀྱི།།
དཔེ་སོགས་བོད་ལ་མི་འོང་བཞིན།།
ད་དུང་ཨུ་ཚུགས་བྱེད་པ་ནི།།
རྣམ་དཔྱོད་ཅན་གྱི་ལས་ཡིན་ནམ།།
གཞན་ལས་ལེགས་ཆ་བླང་དགོས་ཀྱི།།
རང་གི་རིག་གཞུང་སྤེལ་དགོས་ཀྱི།།
འོན་ཀྱང་ཨུ་ཚུགས་མཐའ་སྐྱེལ་གྱིས།།
བྱ་བ་གཉེར་བ་ནོར་འཁྲུལ་ཡིན།།
འཆད་མཁན་དེ་ལ་དཀའ་ཁག་ཡིན།།
ཉན་མཁན་དེ་ལ་མགོ་རྨོངས་ཡིན།།
ལག་ལེན་དངོས་སུ་མཐོང་རྒྱུ་དཀོན།།
གོ་བ་ཙམ་ཡང་ཆགས་རྒྱུ་དཀའ།།
དེས་ན་བོད་སྒྱུར་ཅི་བྱས་ཀྱང་།།
སྐད་ཀྱི་གཤིས་དང་བོད་མིའི་བློ།།
གཉིས་ཀ་གཞི་རྩར་བཞག་བྱས་ཏེ།།
བརྩོན་པ་བསྟེན་ན་དྲིན་ཆེན་པོ།།
སེམས་པ་ཚོར་བ་ཞིག་གི་དབང་དུ་སོང་ནས་ཤར་མར་བྲིས།
No comments:
Post a Comment