ལས་དབང་གིས་ཕྲད་པའི་འཛིན་གྲོགས་ལ་ཕུལ་བ།

སྔོན་བསགས་ཀྱི་ལས་འཕྲོ་ལས༎

བློ་མཐུན་གྱི་གྲོགས་ཁྱུ་ཞིག།

མ་དྲན་པའི་གནས་ཤིག་ནས༎

དགེ་འོས་ཀྱི་འཛིན་གྲྭར་ཕྲད༎

ཐུགས་སྒམ་གྱི་སྤྱོད་ཚུལ་འཛིན༎

རྣར་སྙན་གྱི་དགོད་སྒྲ་སྒྲོགས༎

སྨྲ་བརྗོད་ལ་ཐོགས་མེད་མ༎

སྐལ་ལྡན་དེ་ཤེས་རྒྱ་ཆེ༎

རིག་པ་ནི་ཤིན་ཏུ་བཀྲ༎

དུས་ཚོད་ལ་དམ་འཛིན་ཆེ༎

རང་གྲོགས་ལ་བརྩེ་འདང་ཅན༎

ཆོས་སྒྲུབ་དེ་བརྩོན་པ་ཆེ༎

ཁུར་འདེགས་ཀྱི་བསམ་པ་བརྟན༎

འཛིན་གྲོགས་ལ་ཞེན་པ་ཟབ༎

ལྷག་བསམ་གྱི་གངས་རི་དཀར༎

ཆོས་ཉིད་དེ་བསམ་ཤེས་ཆེ༎

རང་མི་ལ་ཞེན་པ་དཀར༎

རང་སྐད་ལ་སྤྲོ་བ་ལྡན༎

རང་རྒྱལ་ལ་དགའ་ཞེན་ཅན༎

མཁའ་འགྲོ་དེ་ལ་རྒྱ་ཆེ༎

ཉམ་ཆུང་གི་ཚུལ་འཛིན་ཡང༌༎

བློ་གྲོས་ཀྱི་གནས་ཚད་མཐོ༎

མྱོང་ཅན་གྱི་འཛིན་གྲོགས་མ༎

ཕུན་སྒྲོལ་དེ་བསྟུན་མཁས་ཆེ༎

ཅ་ཅོ་ཡི་ངག་བསྡམས་ཏེ༎

སེམས་ཆུང་གི་གཤིས་ལ་བརྩོན༎

སྨྲ་ཉུང་གི་གཉོམ་སྤྱོད་མ༎

ཆོས་སྐྱིད་དེ་ཁོག་རྒྱ་ཆེ༎

མཛེས་སྡུག་གི་དཔལ་གྱིས་ཕྱུག།

གཞན་ཚོར་ལ་བསམ་ཤེས་ལྡན༎

མྱུར་སློབ་ཀྱི་རིག་གསལ་མ༎

ཚེ་ལྷ་དེ་བློ་གྲོས་ཆེ༎

ཞལ་རས་དེ་མཚར་བ་བཞིན༎

ནང་སེམས་དེ་གངས་ལྟར་དཀར༎

སེར་སྣ་ཡི་སྒོ་ལྕགས་བྲལ༎

ལེགས་བཤད་དེ་གཏོང་ཕོད་ཆེ༎

ཆུང་ཆུང་གི་ལུས་འཛིན་ཡང༌༎

ཆེ་ཆེ་ཡི་བསམ་པ་ལྡན༎

སློབ་སྦྱོང་ལ་བརྩོན་པ་ཅན༎

ཆོས་སྒྲོན་དེ་ལག་རྩལ་ཆེ༎

འཛུམ་ལྡན་གྱི་ཞལ་ངོམ་ཞིང༌༎

ཤེས་ཡོན་གྱི་བདུད་རྩི་འཐུང༌༎

བཟང་ངན་གྱི་དབྱེ་ཤེས་མ༎

ཀུན་ཆོས་དེ་རྣམ་དཔྱོད་ཆེ༎

བློ་གྲོས་ཀྱི་དཔངས་མཐོ་ཞིང༌༎

རྒྱལ་ཞེན་གྱི་བསམ་པ་དཀར༎

དྲང་བདེན་ལ་དགའ་ཞེན་ཅན༎

དགེ་རྒྱས་དེ་དཔའ་མཛངས་ཆེ༎

གངས་དཀར་གྱི་སེམས་དང་ལྡན༎

ས་གཞི་ཡི་བཟོད་པ་འཆང༌༎

བསྟུན་མཁས་ཀྱི་བློ་ཅན་པ༎

ཚེ་དཔག་དེ་ཤེས་རབ་ཆེ༎

སྙིང་རྗེ་ཡི་རྩ་བ་སྦོམ༎

རང་གནས་སུ་གཞན་འཇོག་བྱེད༎

ཨ་གསར་གྱི་སེམས་མེད་མ༎

པ་སངས་དེ་བརྩེ་འདང་ཆེ༎

མི་ཆུང་གི་རྐང་འཁོར་བཞོན༎

དུས་ཐོག་ཏུ་འཛིན་གྲྭར་ཡོང༌༎

ང་རྒྱལ་གྱི་ཁེངས་མེད་མ༎

ཨོ་རྒྱན་དེ་བསམ་སྟོབས་ཆེ༎

ངན་གོམས་ཀྱི་གོས་རྙིང་ཕུད༎

མི་བཟང་གི་གྲལ་དུ་ཞུགས༎

སློབ་སྦྱོང་ལ་དོན་གཉེར་ཅན༎

བྱམས་པ་དེ་ཕུགས་བསམ་ཆེ༎

དུས་ཐོག་ཏུ་ཉལ་ལང་བྱེད༎

སློབ་སྦྱོང་ལ་འདུན་པ་ཟབ༎

བསམ་ཤེས་ཀྱི་རྒྱན་ཆ་བ༎

པད་ཆོས་དེ་སྤྱི་སེམས་ཆེ༎

ཀུ་རེ་ལ་དགའ་མོས་ལྡན༎

སེམས་མཐུན་གྱི་གྲོགས་པོ་མང༌༎

གུ་ཡངས་ཀྱི་བསམ་པ་ཅན༎

ཆོས་འཛོམས་དེ་བཟོད་སྒོམ་ཆེ༎

བློ་གྲོས་ཀྱི་ནོར་གྱིས་བརྒྱན༎

སློབ་བརྩོན་གྱི་རྟ་ཕོ་རྒོད༎

གྲོགས་ཕན་གྱི་ཕྱག་བཟང་མ༎

ལྷག་པ་དེ་སྙིང་སྟོབས་ཆེ༎

ཕུགས་བསམ་གྱི་མིག་རྒྱང་རིང༌༎

སྣེ་འཁྲིད་ཀྱི་ནུས་མཐུ་རྫོགས༎

ཚུལ་མཐུན་གྱི་གཤིས་བཟང་མ༎

བདེ་གསར་དེ་ལྷག་བསམ་ཆེ༎

སྐྱེས་པ་ཡི་ལ་རྒྱ་འཆང༌༎

ཁྲེལ་གཞུང་གི་མཇུག་མ་རིང༌༎

རྐང་ཟུང་ལ་འཁོར་ལོ་ཅན༎

བསྟན་ནོར་དེ་ལས་བརྩོན་ཆེ༎

བཟོད་བསྲན་གྱི་བྲག་རི་བརྟན༎

རྟོག་དཔྱོད་ཀྱི་ནམ་མཁའ་ཡངས༎

སྨྲ་བརྗོད་ལ་སྙིང་སྟོབས་ཅན༎

ཟླ་བ་དེ་འགན་ཁུར་ཆེ༎

ལས་བསྐོས་ཀྱི་འཛིན་གྲོགས་ཚོའི༎

འབུར་ཐོན་གྱི་ཁྱད་ཆོས་དག།

རང་ཉིད་ལ་སྣང་ཚུལ་བཞིན༎

ནག་རིས་སུ་བཏབ་པ་ལགས༎

འདིར་བཤད་ཀྱི་གཏམ་ཚོགས་སུ༎

སྙིང་གཅོད་ཀྱི་ཆ་ཡོད་ཚེ༎

བློ་རྨོངས་ཀྱི་གཤིས་མཐོང་ནས༎

• བཟོད་གསོལ་རེ་གནང་བར་འཚལ༎