ཚེ་སྔོན་ལས་ཀྱི་མཐུ་ལས།།
རྩོམ་སྒྱུར་ཟབ་སྦྱོང་ནང་ལ།།
ཟླ་གཅིག་ཞག་མ་བཞིའི་རིང་།།
བསྡད་རྒྱུའི་གོ་སྐབས་ཐོབ་སོང་།།
དུས་ཡུན་གང་འཚམ་ཐུང་ཡང་།།
འཛིན་གྲོགས་ཕོ་མོ་བཟང་བས།།
བྲལ་ནས་གང་འཚམ་སོང་ཡང་།།
ཁོང་ཚོ་སེམས་ནས་དྲན་གྱི།།
ཐེངས་གཅིག་འཛིན་གྲོགས་བདེ་བཀྲས།།
ཆོས་དགེར་དྲི་བ་བཏང་ནས།།
དྲིས་ལན་གནང་བའི་སྐབས་ལ།།
ཁོ་རང་གཉིད་པ་དྲན་གྱི།།
འགན་བདག་ཆོས་སྒྲོན་ལགས་ཀྱིས།།
ཕུན་ཚོགས་ཉི་མ་གསུང་དུས།།
རང་ཉིད་བོས་སོང་བསམ་ནས།།
ལགས་ཡོད་ལབ་པ་དྲན་གྱི།།
འཛིན་གྲོགས་ཉི་མ་གྲགས་པས།།
ཁམས་སྐད་དྭངས་མ་བརྒྱབ་ནས།།
འཛིན་གྲོགས་ཐུབ་ཚེ་ལགས་དང་།།
བགྲོ་གླེང་གནང་བ་དྲན་གྱི།།
ང་ཚོའི་རླངས་རྫས་རྫོགས་ནས།།
འཛིན་གྲོགས་བློ་བསྟན་ནང་ལ།།
མི་མགོ་བརྒྱད་ཙམ་འདུས་ནས།།
དགོང་ཟས་བཟས་པ་དྲན་གྱི།།
རྩེད་ཆས་ཉོ་བའི་ཆེད་དུ།།
འཛིན་གྲོགས་ཐུབ་ཚེ་ལགས་ཀྱིས།།
ཧིན་སྒོར་ཆིག་སྟོང་ལྔ་བརྒྱ།།
ཞལ་འདེབས་གནང་བ་དྲན་གྱི།།
རྩོམ་སྒྱུར་ཟབ་སྦྱོང་དེ་ལ།།
བསྡད་ཡུན་རིང་པོ་མིན་ཡང་།།
སྐྱིད་པོ་ཧ་ཅང་བྱུང་བས།།
དྲན་རྒྱུ་ཧ་ཅང་མང་གི།
No comments:
Post a Comment