རྩོམ་སྒྱུར་ཟབ་སྦྱོང་བཅུ་པ་ལ།།
མི་གྲངས་སུམ་ཅུའི་ཚད་ལགས་ཀྱང་།།
དགོངས་ཡངས་སྒོ་ནས་སོ་བརྒྱད་བཙུད།།
བཀའ་དྲིན་ཆེ་སོང་དཔེ་མཛོད་ཁང་།།
རྒྱུ་སྤུས་ལེགས་ཤིང་མདོག་མཛེས་པའི།།
དེབ་དང་ཞ་སྨྱུག་སུབ་བྱེད་སོགས།།
ཡིག་ཆས་མང་པོ་རིན་མེད་བསྩལ།།
བཀའ་དྲིན་ཆེ་སོང་དཔེ་མཛོད་ཁང་།།
སྡོད་གནས་མེད་ལ་སྡོད་ཤག་དང་།།
དཀའ་ངལ་ཅན་ལ་དཔལ་འབྱོར་གྱིས།།
བརྩེ་བ་ཆེན་པོས་གཟིགས་སྐྱོང་མཛད།།
བཀའ་དྲིན་ཆེ་སོང་དཔེ་མཛོད་ཁང་།།
ཉེར་མཁོའི་དཔེ་དེབ་མང་པོ་ཞིག།
གཞན་ལས་ཉོ་བ་ལ་སོགས་ཀྱིས།།
བདག་ཅག་རྣམས་ལ་ཕངས་མེད་སྦྱིན།།
བཀའ་དྲིན་ཆེ་སོང་དཔེ་མཛོད་ཁང་།།
འཛིན་ཆས་ཚང་བའི་འཛིན་གྲྭ་ཡོད།།
སྐོམ་ངལ་སེལ་བའི་མངར་ཇ་ཡོད།།
ལས་དོན་ཅན་ལ་དགོངས་པ་ཡོད།།
བཀའ་དྲིན་ཆེ་སོང་དཔེ་མཛོད་ཁང་།།
ལྷག་བསམ་དུང་ལྟར་དཀར་བ་དང་།།
ཐུགས་རྒྱུད་ཤེས་བྱས་གཏམས་པ་ཡི།།
ཚད་ལྡན་དགེ་རྒན་བཀོད་སྒྲིག་གནང་།།
བཀའ་དྲིན་ཆེ་སོང་དཔེ་མཛོད་ཁང་།།
ངལ་བརྒྱ་ཁྱད་དུ་བསད་མཛད་ནས།།
ཤེས་ལྡན་མི་སྣ་མང་པོ་ཞིག།
གསུང་བཤད་ཆེད་དུ་གདན་ཞུ་གནང་།།
བཀའ་དྲིན་ཆེ་སོང་དཔེ་མཛོད་ཁང་།།
དཔེ་མཛོད་ཁང་གི་བཀའ་དྲིན་དེ།།
ཡིད་ལ་བཅངས་ནས་འགྲོ་རྒྱུ་ཡིན།།
དཔེ་མཛོད་ཁང་གི་བགྱི་བ་ཀུན།།
ལམ་དུ་འགྲོ་བའི་སྨོན་ལམ་ཡོད།།
༢༠༡༥།༠༨།༠༤ ཉིན་རྡ་ས་དཔེ་མཛོད་ཁང་གིས་བདག་ཅག་ཟབ་སྦྱོང་བ་རྣམས་ལ་གཟིགས་སྐྱོང་ཚད་མེད་གནང་བར་ཐུགས་རྗེ་ཆེ་ཞུ་ཆེད་དུ་བྲིས།
No comments:
Post a Comment