སྐད་དང་ཡི་གེར་ཐོགས་པ་བྲལ།།
བྱམས་དང་སྙིང་རྗེས་རང་རྒྱུད་བརླན།།
རིག་གཞུང་ཕྱུག་མོའི་རྒྱུན་འཛིན་བ།།
རླབས་ཆེན་མི་རིགས་གངས་ཅན་པ།།
གཏོང་ཕོད་རྒྱལ་པོ་བྱམས་པར་འཁུ།།
སྙིང་སྟོབས་གངས་སེང་དཀར་མོར་འགྲན།།
རྣམ་དཔྱོད་འཇིག་རྟེན་གསུམ་ལས་འགོངས་།།
རླབས་ཆེན་མི་རིགས་གངས་ཅན་པ།།
ཆོས་ཀུན་རྟེན་འབྱུང་བསམ་བློ་བ།།
བདག་བས་གཞན་གཅེས་ཉམས་ལེན་པ།།
འཇིག་རྟེན་ཀུན་བདེ་ལྷུར་བླང་བ།།
རླབས་ཆེན་མི་རིགས་གངས་ཅན་པ།།
བླ་མ་སྤྱི་བོའི་གཙུག་ཏུ་བཀུར།།
ཕ་མ་མིག་གི་འབྲས་བུར་འཛིན།།
སྤུན་ཟླ་ཁོག་སྙིང་བས་ཀྱང་གཅེས།།
རླབས་ཆེན་མི་རིགས་གངས་ཅན་པ།།
དཀར་པོ་གངས་ལྗོངས་ཕ་སའི་ཕྱིར།།
དམར་པོ་མེ་ལ་སྒྲོན་སྤོབས་ཤིང་།།
སྔོན་མོ་ཆུ་ལ་ལྕེབས་པར་ནུས།།
རླབས་ཆེན་མི་རིགས་གངས་ཅན་པ།།
མཚོན་ལ་འཇིགས་པའི་སྙིང་མ་མཆིས།།
ནོར་ལ་རྔམ་པའི་སེམས་མི་མངའ།།
གཡོ་རུ་ཚུད་པའི་བློ་མི་བདོག།
རླབས་ཆེན་མི་རིགས་གངས་ཅན་པ།།
རང་སྐད་སྐྱུར་བའི་ནད་ལས་གྲོལ།།
རང་མིར་སྡང་བའི་རྒྱ་ལས་འདས།།
རང་ཡུལ་བརྗེད་པའི་གཉིད་ལས་སད།།
རླབས་ཆེན་མི་རིགས་གངས་ཅན་པ།།
No comments:
Post a Comment