མི་ཚེའི་བརྒྱུད་རིམ།

བཅུ་ལ་ལོན་དུས་སྐྱེས་ཡུལ་བཞག་ཡིན།།
བཅུ་གཉིས་ཆགས་དུས་མི་ཡུལ་འབྱོར་སོང་།།
སློབ་གྲྭ་འགྲིམ་པའི་གོ་སྐབས་བཟང་པོ།།
མགོན་པོའི་ཐུགས་རྗེས་བདག་ལ་ཐོབ་སོང་།།

ཨ་མ་དྲན་པའི་དྲན་གདུང་ཁུར་ནས།།

གནའ་དེང་རིག་གནས་སྦྱོང་ལ་བརྩོན་ཡིན།།
འཛིན་རིམ་བརྒྱད་པ་ཐོན་པའི་རྗེས་ལ།།
ཝ་ར་ཎ་སིར་འཛུལ་ཞུགས་བྱས་ཡིན།།

སློབ་དཔོན་འཛིན་གྲྭ་ཐོན་མ་ཐག་ཏུ།།
དགེ་འོས་འཛིན་གྲྭར་སྤྲོ་བས་ཞུགས་ཡིན།།
པ་ཀུལ་ལག་ཤེས་ཁང་དུ་བསྐྱོད་ནས།།
ཟླ་བ་གསུམ་རིང་སློབ་འཁྲིད་བྱས་ཡིན།།

བོད་ཕྲུག་ཁྱིམ་སྡེ་ཕ་མ་འདྲ་ཞིང་།།
དྲིན་ལན་འཇལ་འདོད་སེམས་ལ་ཡོད་པས།།
སྦེལ་ཀོབ་བོད་ཁྱིམ་སློབ་གྲྭར་སོང་ནས།།
ལོ་ངོ་གསུམ་རིང་དགེ་རྒན་བྱས་ཡིན།།

རྩོམ་སྒྱུར་ཟབ་སྦྱོང་བཅུ་པར་ཞུགས་ནས།།
ལོ་ཙཱའི་རིག་གནས་སྦྱོང་ལ་འབད་ཀྱང་།།
བུ་མོ་དྲན་པའི་གདུང་བ་ལྕི་མོས།།
ཟླ་གཅིག་སོང་རྗེས་ནང་དུ་ལོག་ཡིན།།

སེར་བྱེས་དགོན་གྱིས་བསྐུལ་བ་གཞིར་བཟུང་།།
སྐད་སྒྱུར་འཛིན་གྲྭའི་དགེ་རྒན་བྱས་ཡིན།།
དགེ་ཆེའི་ས་མིག་ཡོད་རབས་ཐོས་ནས།།
རྡ་རམ་ས་ལར་བཅར་འདྲིར་སོང་ཡིན།།

དགེ་ཆེའི་གནས་སུ་འདེམས་ཐོན་བྱུང་ནས།།
བཟའ་མི་ངེད་གསུམ་མོན་གྷོར་སྤོས་ཡིན།།
དགེ་ཆེ་ཞེས་པའི་མིང་དེ་བཟུང་ནས།།
ལོ་ངོ་གཉིས་ཙམ་འཁོར་ལ་ཉེ་འདུག།

བློ་མཐུན་དགེ་ལས་འཕྲད་པའི་སྒང་ལ།།
སློབ་མའི་གཤིས་ཀ་འཇམ་པ་དེ་ཡིས།།
ལོ་ངོ་གཉིས་ལ་ཕྱི་མིག་འཕེན་དུས།།
སེམས་ལ་དགའ་སྤོབས་གང་འཚམ་རྒྱས་སོང་།།

ཕྱི་ལོ་ ༢༠༡༨ ཕྱི་ཟླ་ ༠༥ ཚེས་ ༡༨ ཉིན་གྱོས་མོ་ལ་ནད་གཡོག་རྒྱུག་པའི་ཞོར་དུ་བྲིས།