སློབ་གྲྭ་དང་གྲོང་མི།

རང་གི་ཕྲུ་གུ་སློབ་གྲྭ་འདིར།།
མེད་པའི་རྒྱུ་མཚན་ལ་བརྟེན་ནས།།
སློབ་གྲྭར་ཁ་ཡ་མི་བྱེད་པའི།།
གྲོང་མི་རེ་ཟུང་མཐོང་རྒྱུ་འདུག།

རང་གི་ཕྲུ་གུ་སློབ་གྲྭ་ནས།།
ཐོན་ནས་ད་ལྟ་མེད་ན་ཡང་།།
སློབ་གྲྭར་ཤ་ཚ་རབ་བྱེད་པའི།།
གྲོང་མི་རེ་ཟུང་མཐོང་རྒྱུ་འདུག།

རང་གི་ཕྲུ་གུ་སློབ་གྲྭ་འདིར།།
ད་ལྟ་སློབ་མུས་ཡིན་ན་ཡང་།།
སློབ་གྲྭར་ཕན་པ་མི་སྒྲུབ་པའི།།
གྲོང་མི་རེ་ཟུང་མཐོང་རྒྱུ་ཡིན།།

རང་གི་ཕྲུ་གུ་སློབ་གྲྭ་འདིར།།
སློབ་མུས་ཡིན་པའི་རྒྱུ་མཚན་གྱིས།།
སློབ་གྲྭར་ནམ་ཡང་རོགས་བྱེད་པའི།།
གྲོང་མི་གང་འཚམ་མང་པོ་འདུག།

རང་གི་ཕྲུ་གུ་སློབ་གྲྭ་འདིར།།
བསླབས་མྱོང་མེད་པའི་རྒྱུ་མཚན་གྱིས།།
སློབ་གྲྭ་ཡལ་བར་འདོར་བྱེད་པའི།།
གྲོང་མི་རེ་ཟུང་མཐོང་རྒྱུ་འདུག།

རང་གི་ཕྲུ་གུ་སློབ་གྲྭ་འདིར།།
བསླབས་མྱོང་ཡེ་ནས་མེད་ན་ཡང་།།
སློབ་གྲྭར་གང་ཐུབ་ཕན་བྱེད་པའི།།
གྲོང་མི་རེ་ཟུང་མཐོང་རྒྱུ་འདུག།

སློབ་གྲྭ་ཆུང་ཆུང་འདི་ཉིད་ལ།།
ཤ་ཚ་བྱེད་མཁན་མང་བ་ཡིས།།
ཡར་རྒྱས་གང་འཚམ་སོང་ཡོད་པས།།
ཁྱེད་ཅག་བཀའ་དྲིན་བརྗེད་མི་སྲིད།།

ཕྱི་ལོ་ ༢༠༡༨ ཟླ་ ༠༥ ཚེས་ ༠༧ ཉིན་བྲིས།